2Ki 2 | MEU | STEP | Iehova ese Elia na koehirihiri amo guba ai baine daelaia eto; una negana ai Elia bona Elisaia na Gilgal amo e laova.

2 Kings 2

Elia na guba ai e heabi dae

1 Iehova ese Elia na koehirihiri amo guba ai baine daelaia eto; una negana ai Elia bona Elisaia na Gilgal amo e laova. 2 Bena Elia ese Elisaia e hamaoroa, eto, Mani emu kara iniseni ai do ba noho, badina be Iehova ese vada e siaigu, Betele bainala. A Elisaia eto, Iehova e maurimu bona oi o maurimu heḡereḡerena, lau basina rakatanimu. Taunabunai, raruosi na Betele ela. 3 Bena peroveta oreana taudia Betele ai e nohova na Elisaia dekena e raka lasi, e hereva henia, eto, Oi dibamu hari dina ai Iehova ese biagumu na oiemu amo baine abia oho a? Ia eto, Oibe, dibagu; asio hereva.

4 Bena Elia ese e hereva henia, eto, Elisaia e, mani emu kara iniseni ai do ba noho, badina be Iehova ese vada e siaigu, Ieriko bainala. A ia na eto, Iehova e maurimu bona oi o maurimu heḡereḡerena, lau basina rakatanimu. Taunabunai idia na Ieriko ai e kau. 5 Bena peroveta oreana taudia Ieriko ai e nohova ese Elisaia e raka henia kahi, e hereva henia, eto, Oi dibamu hari dina ai Iehova ese biagumu na oiemu amo baine abia oho a? Ia na e haere, eto, Oibe, dibagu; asio hereva.

6 Elia ese ma e hereva henia, eto, Mani emu kara iniseni ai do ba noho, badina be Iehova ese vada e siaigu, Ioridane sinavaina bainala. A ia na eto, Iehova e maurimu bona oi o maurimu heḡereḡerena, lau basina rakatanimu. Taunabunai, raruosi na e raka lao. 7 Tatau imahui peroveta oreana amo danu ela, dauhai e giniva, idia raruosi Ioridane sinavaina isena ai e giniva negana ai. 8 Bena Elia ese ena hahedoki badana e abia, e lokua, bena ranu e botalaia; bena ranu na e parara, kahana ela kahana ela, ela bona raruosi na tano kaukauna ai e raka hanai.

9 E raka hanai, bena Elia ese Elisaia e hamaoroa, eto, Emu amo do asina heabi oho ai, ba noigu ede baina karamu toma. Elisaia eto, Na noimumu, lalomu siahuna lauegu ai ba habadaia harua. 10 Elia eto, Ḡau aukana ta o noinoilaiamu; ḡau tamona, emu amo baina heabi oho negana ai ba itagu, emu ai unu baine heto, a basio itagu be unu basine heto. 11 Idia na dounu e rakava bona e hereva-herevava ai, lahi kariotana ta bona lahi hosidia ese raruosi e hapararadia. Bena Elia na koehirihiri amo e dae guba ai. 12 Elisaia e itaia, bena e boi lolo, eto, Tamagu e, tamagu e, Israel ena kariota bona ena hosi-gui taudia. Bena se itaia lou. Bena ia sibona ena dabua e abidia, e daredia parara.

Elisaia ese Elia e boloa

13 Hahedoki badana, Elia ena amo e moru ḡauna, na Elisaia ese e abia, e lou lao, Ioridane sinavaina isena ai e gini. 14 Bena hari hahedoki badana Elia ena amo e moru ḡauna na e abia, ranu e botalaia, eto, Iehova, Elia ena Dirava, be edeseni ai? Ranu e botaia negana ai, ranu na e parara, kahana ela kahana ela; bena Elisaia e raka hanai.

15 Ieriko peroveta oreana taudia ese e itaia, ia na idia vairadiai, bena idia na eto, Elia lalona siahuna ese Elisaia e roheamu. Bena ia dekena ela, tano ai e igo diho ia vairanai. 16 Bena idia ese e hamaoroa, eto, A itaia, emu hesiai taudia dekemai ai na goada taudia imahui; mani emu kara idia na baela, biagumu bae tahua; reana Iehova ena Lauma ese vada e abia isi, ororo ta ai eiava koura ta lalonai vada e tahoa dobi. Bena ia e haere, eto, Basio siaidia. 17 To idia ese e ha-uraia ela bona e hemarai, bena eto, A siaidia. Taunabunai, idia ese tatau imahui e siaidia, idia na dina toi e tahua, to asie davaria. 18 Bena e lou lao, Elisaia dekenai, ia na dounu Ieriko ai nohona ai. Bena ia ese e hamaorodia, eto, Na hamaoromui nato “Basiola” ani?

19 Bena hanua taudia ese Elisaia e hamaoroa, eto, A itaia, ina hanua e ginimu gabuna na gabu namona, egu lohia o itaiamu heḡereḡerena. A ranu na dika, bona tano anina e ruru negemu. 20 Ia eto, Nau matamatana ta a mailaia, lalonai damena ba uda. Taunabunai idia ese e mailaia ia dekenai. 21 Bena ia na ranu gurina ela, damena na ranu lalonai e tahoa dobi, eto, Iehova na ini e gwau tomamu: Ina ranu vada na haḡoevaia; ina negana amo ia ese mase eiava ruru-nege basine havaraia. 22 Taunabunai, una ranu vada e namo ema bona hari dina, Elisaia ese e gwauraia herevana heḡereḡerena.

23 Unu amo ia na e dae lao Betele ai. Dala ai e laova ai na memero maraḡidia haida na hanua amo e raka lasi, e kirikirilaia, eto, Kwara boha e, a dae lao, kwara boha e, a dae lao. 24 Ia na e gini kerehai, e itadia; bena Iehova ladana ai e uduguiraidia. Bena bea hahinedia rua na uda amo e raka lasi, memero hari-ahui rua e aladia mase. 25 Unu amo ia na ena dala ai e raka, ela bona Karamele ororona; bena unu amo Samaria ma e lou lao.